Tauaromahi

Ka noho takitahi ki te whakaoti hopanga ki tētahi hātepe i āta hangaia nei kia aroā e tētahi pūrere rorohiko. Ka whakauru i te hātepe mā te hanga i tētahi papatono e whakamahi ana i ngā tāuru, i ngā tāputa, i ngā raupapanga, i ngā koromeke, ngā rerekētanga o ngā momo raraunga katoa, te whakamahi i ngā paheko whakatairite me ngā paheko taketake. Ka mōhio hoki ki hea whakamahia ai ngā momo anga whakahaere. Ka whakamārama/tuhi i te papatono, me te whakamahi hoki i tētahi ara tika mō te whakamātautau me te patuiro. Ka mārama hoki, ka taea e te rorohiko te pupuri i ngā momo raraunga katoa mā te whakamahi i ngā mati tāhūrua.

Horopaki

Kua tūhurahia e ngā ākonga te tikanga o te manaaki tangata me te manaaki i tētahi ope nui ki te marae, ki te kura rānei. I tēnei tūmahi, ka hanga ngā ākonga i tētahi taupānga ā-ipurangi mō tētahi pūrere hei tautoko i te tangata ki te rapu nohonga i te wā ka heipū tētahi mate whawhati tata, tētahi kaupapa nui rānei. Me taea hoki te rapu marae hei nohonga mō tētahi rahinga tangata. Ka āwhina te taupānga nei i te iwi ki te rēhita i tō rātou wāhi, kia pai ai te rapu i a rātou. He tautoko nui tēnei i ngā kaupapa ohotata, mō ngā ope tāngata e hiahia ana ki te toro ki a rātou anō.

Ngā putanga ako

Ka taea e ngā ākonga te hanga papatono e whakamahi ana:

●  i ngā taurangi o ngā momo raraunga rerekē (hei tauira, i ngā atahanga me ngā kuputuhi)

●  i ngā paheko arotau kia āhei mai ngā paheko maha (e whakatōpū ana i ngā paheko here kia āhei mai ngā whakatairitetanga maha, hei tauira te ingoa tuatahi ME te ingoa whānau.)

●  i te whakaraupapa (te ara e raupapa tika mai ana), te tāruatanga (he koromeke) me te arotau here KI TE kitea te here TĒNĀ ka mahia te mahi nei

●  i tētahi anga tārai rite kia pai ake (te tautapa i ngā wāhanga waehere e tāruatia ana, hei tauira - tā wāhitau marae)

●  i te whakamātautau i te patuiro me te whakatika ake (hei tauira, ka taea te whakamātau i ngā putanga i tūmanakohia)

●  i tētahi whakamārama/tuhinga mō tā rātou papatono me ngā āheinga o te mahi ngātahi kia pai ake.

Hononga ki ētahi atu Wāhanga Ako

Pāngarau: Whakaaro pānga riterite, ōwehenga (pika/rahi mata, rahi kōnae)