Tauaromahi

Kua noho ki te whakaraupapa hopanga ki te hanga hātepe mā te whakamahi i ngā papa waihanga e toru i tēnei mea o te papatono: raupapanga (te raupapa tohutohu), kōwhiringa (te kōwhiri ko tēhea wāhanga o te hātepe e whakahaeretia ai ki ngā uara i tohua), me te tukurua (he tukurua i tētahi wāhanga o te hātepe me te koromeke e whai ana). Ka taea te whakauru i te hātepe mā te hanga i tētahi papatono e whakamahi ana i ngā tāuru, i ngā tāputa, i ngā raupapanga, i ngā koromeke me ngā tohutohu taketake mā te whakamahi i ngā paheko whakatairite.

Ka taea ngā hātepe me ngā papatono māmā te patuiro mā te tautohu mēnā kua hapa ngā tohutohu, te whakatika i aua hapa, me te whakamārama mai he aha i pēnei ai, i pēhea hoki te whakatika. Ka mārama hoki ki te whakaatu mai a te rorohiko i ngā raraunga mā te whakamahi i ngā mati tāhūrua, ā, ka taea e te rorohiko te rapu i ngā raru kua ū ki te rokiroki raraunga me ōna whakawhitiwhitinga. Ka arotakengia ngā momo hātepe e pā ana ki te tere me te pai o te rorohiko ki te rapu me te wehewehe i te raraunga.

Horopaki

Kua tūhura ngā ākonga i te tikanga o te manaaki tangata, me te manaaki i tētahi ope nui tonu i te marae, i te kura rānei. I tēnei tūmahi, e hanga papatono ana ngā ākonga kia taea e ngā tāngata te uru ki tētahi marae, ki tētahi kura rānei, ā, kia taea e ētahi atu rātou te rapu atu. E tino hāngai ana tēnei tūmahi ki tētahi tūāhua mate whawhati tata hei ngā wā e wehe ai ngā tāngata i ō rātou whānau; i tētahi huihuinga nui rānei e wehe ai ngā tamariki i ō rātou mātua. Mā te papatono e āhei ngā kaiwhakamahi te tuku atu i ngā ingoa, ngā whakaahua, me ngā mōhiohio whakapānga atu.

Ngā putanga ako

Ka taea e te ākonga te hanga papatono mō tana hātepe:

  • e whakamahi ana i ngā tāuru. Hei tauira, ka tonoa te kaiwhakamahi kia tāuru i ngā mati (tauoti), i tētahi kupu (aho) rānei
  • e whakamahi ana i ngā tāputa. Hei tauira, ka panoni i ngā atahanga, te oro, ngā kupu rānei i te papatono e whakahaere ana
  • e whakaraupapa ana i ngā tauākī papatono hei whakaot hopanga
  • e whakamahi ana i ngā tauākī ‘i te’ me ngā tauākī ‘mō’ hei koromeke i tētahi wāhanga o te papatono kia tutuki i tētahi momo here
  • e whakamahi ana i ngā tauākī ‘ki te’ hei whakatairite i ngā uara.

Hononga ki ētahi atu Wāhanga Ako

Pāngarau: Whakaaro Pānga Riterite: ōwehenga (ngā pika, rahi mata, rahi kōnae)

Te Reo Matatini: E mārama ana te ākonga ki te āta whai, te āta whakarite anō hoki i ngā tohutohu. Ka taea e te ākonga te whakaputa i te reo kia mārama, kia ngāwari anō hoki.