Tauaromahi

Ka mārama ko tēnei mea te hātepe, he tukanga tohutohu ki te whakaoti hopanga, ka taea hoki te whakamahi i ēnei ki te tuhi papatono rorohiko, ā, me tika, me hāngai ngā tohutohu kia taea ai e te rorohiko te whai. Ka hoatu, ka whai hoki i ngā hātepe patuiro ngāwari i roto i ngā taiao rorohiko, rorohiko-kore hoki. Ka taea ēnei hātepe te whakamahi ki te hanga papatono māmā mā te whakauru i ngā mea pēnei i te tāuru, i te tāputa me ngā raupapanga i tēnei taiao hanga papatono.

Horopaki

Kua tūhura ngā ākonga i te tikanga o te manaaki tangata, me te manaaki i tētahi ope nui tonu i te marae rānei, i te kura rānei. I tēnei tūmahi:

  • e whakarite ana ngā ākonga i ngā moenga mō ngā manuhiri.
  • e hora ana ngā ākonga i ngā tēpu i te wharekai hei whāngai i te whānau.

 

Ngā putanga ako

Ka taea e te ākonga:

  • te tautohu i tētahi tauira tāruarua
  • te tautohu hapa i tētahi tauira tāruarua, ā, ka whakatika ai
  • te tuku me te whai tohutohu māmā kia whakahaere, kia hanga rānei i tētahi tauira tāruarua
  • te whakamātau tohutohu, te tautohu hapa me te whakatika i ngā hapa i kitea.

Ngā mōhiotanga

E mārama ana te ākonga:

  • ko ngā hātepe he kohinga tohutohu māmā, e āta rārangihia ana hei whakaoti hopanga, ā, hei tuhi papatono rorohiko hoki
  • e tika ai te papatono rorohiko, me tika, me mārama ngā hātepe (tohutohu) hei whai, ko te tuhi hātepe kia whakaoti tūmahi ki te reo e māramatia ana e ngā rorohiko me ngā karetao, koia nei, ko te papatonotanga
  • ko tētahi o ngā reo o te papatono rorohiko e whāia ana, arā, ko te Waehere Tāhūrua, ā, e 2 noa iho ana tau, ko te 0 me te 1.

Hononga ki ētahi atu Wāhanga Ako

Pāngarau: Tatau whakamua/whakamuri, Ahunga

Te Reo Matatini: E hono ana tēnei ki ngā wāhanga Te Reo Matatini (tuhinga tohutohu, te tuku me te whai tohutohu, te mārama a te ākonga ki tētahi tūkanga tuhituhi.